Хөрмәтле татарстанлылар!
Кадерле дин кардәшләрем!
Газиз милләттәшләрем!
Бүген – Халыкара туган тел көне. Бу дата дөньяның барча халыкларына үз телләрен һәм рухи мирасын саклау мәсьәләләре хакында искә төшерә. Раббыбыз кешелекне күптөрле итеп яраткан: һәр милләтнең үз мәдәнияте һәм теле бар. Һәрберебезгә Ул үз халкының дәвамчысы булып туарга язган. Коръәндә болай диелә:
وَمِنْ آيَاتِهِ خَلْقُ السَّمَاوَاتِ وَالْأَرْضِ وَاخْتِلَافُ أَلْسِنَتِكُمْ وَأَلْوَانِكُمْ إِنَّ فِي ذَلِكَ لَآيَاتٍ لِّلْعَالِمِينَ
Мәгънәсе: “Күкләрне һәм җирне яралтуы да, телләрегезнең һәм төсләрегезнең төрлелеге дә — Аның билгеләреннән. Һичшиксез, монда белгәннәр өчен билгеләр бар” ("әр-Рум" сүрәсе, 22 аять). Бу аятьтән аңлашылганча, җир йөзендә күп телләрнең булуында Аллаһының Хикмәте һәм Кодрәте бар, һәм безнең изге бурычыбыз — туган телебезне Аның әманәте итеп саклау. Бер милләт вәкиле булып тууын кеше Раббыбызның ихтыяры итеп кабул итәргә тиеш һәм халкын үзенең Яралтучысына якынайту өчен тырышлыклар куярга тиеш.
Туган телебезне - татар телен онытмагыз, газиз милләттәшләрем! Аны саклау һәм баету өчен, Раббыбыз милләтебезгә Тукай кебек шәхесләрне бүләк иткән. Бу кыйммәтне югалтырга хакыбыз юк.
Татарстан Мөфтие Камил хәзрәт Сәмигуллин.
