Әссәламү галәйкүм вә рахмәтуллаһи вә бәракәтүһ!
Татарстан Җөмһүрияте мөселманнары Диния нәзарәте һәм шәхсән үз исемемнән Сезне якынлашып килүче Ураза гаете - Гайдел Фитыр белән ихлас күңелдән котлыйм.
Бер ай буена уразалар тотып, тәравих намазлары укып, нәфел гыйбадәтләрендә рухи чистарыну һәм ныклык җыеп, шушы мөбарәк булган Ураза гаетенә дә килү бәхетенә ирештек. Аллаһы Сөбхәнәһү вә Тәгаләгә тагын да якынаеп, изге гамәл-гыйбадәтләребезне арттырып, үзебезнең рухыбызга булган игътибарны үстердек, күңелләребезне иман нуры белән бизәдек. Аллаһы Тәгалә каршындагы изге бурычыбызны үтәп, рухи канәгатьлелеккә ирешә алдык.
Шушы Рамазан шәриф аенда җыйган рухи көчебез ел дәвамында изге гамәлләрдә дәвам итәр, һәрбарчабызны изгелеккә, өммәтебез өчен файдалы булган эшләргә чакырып торыр, мөселман өммәтен тагы да ныгытуга алып килер.
Ураза бәйрәме һәрбер йортка бәрәкәт алып килсен, күңелләребезне рухи ныклыкка ирештереп, иман байлыгы, яңа шатлыклар һәм өметләр белән киләсе Рамазан шәриф айларын исәнлектә-саулыкта каршыларга язсын! Аллаһы Тәгалә кылган изге гамәлләребезне кабуллардан кылып, халкыбызга, динебезгә, ватаныбызга хезмәт итәргә яңа көч-куәтләр бирсә иде.
Аллаһы Сөбхәнәһү вә Тәгалә тоткан уразаларыбызны, кылган гамәл-гыйбадәтләребезне, биргән сәдакаләрабызны кабул итеп, үзенең рәхим-шәфкатенә ирештерсен. Амин!
Үзәкләшкән дини оешма –
Татарстан Республикасы мөселманнары
Диния нәзарәте рәисе, мөфти Илдус хәзрәт Фәиз
