Танылган дин әһеле, Димәшкъ университетының (Сүрия) шәригать факультетында декан урынбасары булып эшләүче Тәүфикъ Рамазан әл-Бутый Россия ислам университетына килде һәм студентларга берничә лекция сөйләде.
Лекцияләр, нигездә, ислам икътисадына һәм финансларына, гаилә кыйммәтләрен (җәмгыятьне) саклау темасына багышланды.
Дөньядагы бозыклыкларның килеп чыгуы һәм аларга каршы тору өчен диннең роле, әдәп-әхлактан башка икътисадның үсә алмавы... Галим әлеге һәм башка мәсьәләләргә кагылып үтеп, Татарстан мөселманнарына уңай мөнәсәбәтен белдерде.
Тәүфикъ әл-Бутый лекцияләр белән чыгыш ясаудан тыш, РИУ студентлары һәм мөгаллимнәре белән аралашты, аларның ислам икътисады, гаилә мөнәсәбәтләре буенча булган теоретик сорауларына җавап бирде, шулай ук шәригать кануннарын сәүдә-акча мөнәсәбәтләрендә куллануның гамәли аспектлары турында сөйләде. Шунысын да билгеләп узарга кирәк, бу – соңгы атна эчендә галимнең РИУга икенче мәртәбә килүе. 16 май көнне ул Коръән ятлау буенча узган Олимпиадада катнашкан иде.
21 май көнне галим Болгар шәһәрендә узган тантаналы вакыйгаларда да катнашты. Республикабызның дин үсешенә киләчәктә үзеннән зур ярдәм-өлеш кертергә ниятләвен җиткерде. Сүрия кунагы Татарстанны бик тә ошатып китте.
Айдар КАРИБУЛЛИН
"Дин вә мәгыйшт" газетасыннан
