Иран «Персеполис»ыннан Казанга күчеп килгән «Рубин»ның яңа капкачысы Алирез Хагиги мөселманнар яшәгән республика командасы өчен чыгыш ясавына шат булуын җиткерде.
Исегезгә төшерәбез: Хагиги быелның гыйнвар ае урталарында «Рубин» белән контракт төзегән иде. 23 яшьлек уенчы белән килешү дүрт елга исәпләнгән.
Хагиги Казанда җомга намазларына йөрергә исәпли. «Мин монда хәләл ризык куллана, мәчеткә җомга намазларына йөреп үземне уңай хис итә алачакмын», – дип сөйләде футболчы.
Ул шулай ук футболдан тыш мавыгулары турында да искәртте: «Буш вакытларымда кино карыйм, китаплар укыйм, гыйбадәт кылам. Мин әле Казанда озак булмадым, әмма шәһәр миңа бик тә ошады».
