«Кол Шәриф оныклары»ның бишенче бәйгесе узды

25 май 2012 ел 13:46

Чаллы мөхтәсибәтенең актив булышлыгында шәһәрдә моннан биш ел элек “Кол Шәриф оныклары” хәрәкәте туды. Анда катнашучылар ел дәвамында берничә этап аша узалар. Алар бәйге рәвешендә оештырыла. Ел саен ошбу хәрәкәткә яңа балалар тартыла тора. Быелгы бәйгеләрдә 80 малай катнашкан. Аларның 20 се ярымфиналга, ә 6 сы финалга үткән. 16 майда шушы егетләр арасыннан иң яхшысын сайлап алу бәйгесе булды. Ул шәһәрнең “Чишмә” исемле Халыклар дуслыгы йортында күпсанлы тамашачылар катнашында барды. Милли киемнәрдә 6 егет – 84 нче Гали Акыш лицееннан 6 “б” сыйныфы укучысы Раил Сәхәбиев, шул ук лицейдан 8 “а” сыйныфы укучылары Илдар Котдусов һәм Радик Гафиятуллин, 8 “б”дан Артур Хөсәенов, 2 нче татар гимназиясенең 7 “а” сыйныфы укучысы  Булат Шәмсуров, 8 “а”дан Рөстәм Хөснуллин сәхнәгә чыктылар. Чаллы шәһәре имам-мөхтәсибе Әлфәс хәзрәт Гайфуллин егетләрне җылы тәбрикләде, аларның милләтебез өчен  чын шәхесләр булып үсүен теләде. Һәм шундук сынамышлар башланды. Иң башта егетләр татар халык мәкальләрен ни дәрәҗәдә белүләрен күрсәттеләр. Аннары Габдулла Тукайның “И туган тел, и матур тел, әткәм, әнкәмнең теле..”дигән юлларына кушып, үзләре дә шушы темага шигырь юллары иҗат иттеләр. Шуннан соң викторина сорауларына җавап бирү, машина форсункасын сүтеп җыю бәйгесе булды. Егетләргә һәр дөрес җавап, җиңү өчен баллар өстәлә торды. Жюри эшләгән арада егетләр иҗат иткән видеосюжетлар, “Кол Шәриф оныклары” бәйгесендә катнашучыларның спорт ярышлары күрсәтелде. Егетләр әниләренә бүләкләр дә әзерләгәннәр иде. Аны бик җылы сүзләр белән тамашачылар алдында әниләренә тапшырдылар. Һәм менә жюри эшен тәмамлады. Хәрәкәткә нигез салучы, бүгенге көндә дә аны җитәкләүче Фәрит хәзрәт Мөдәррисов бәйгедә катнашучыларның әзерлек дәрәҗәсе югары булуын, аларның бер-берсеннән берничә балл белән генә аерылуын хәбәр итте. Әмма өстен бер балл да җиңүгә китерә. Һәм биредә нәкъ шулай булды да: көндәшләреннән берничә баллга гына өстен чыгып 13 яшьлек Раил Сәхәбиев абсолют җиңүче итеп табылды һәм бәйгенең иң дәрәҗәле призына – велосипедка ия булды. 

         Бәйгене тамаша итәргә егетләрнең әти-әниләре, туганнары, дуслары килгән иде. Без Раилнең әнисе Гүзәл ханым һәм бабасы Миңнефәрит ага белән сөйләштек һәм җиңүче турында өстәмә мәгълүматлар алдык. Аларның әйтүенчә, Раил лицейда “4”ле һәм “5”ле билгеләренә генә укый икән. Карате белән җитди шөгыльләнә, Россия беренчелегенә узган ярышларда катнаша. Былтыр көзен Казанда узган турнирда III урын яулаган. Һәм шулар белән бергә, Раил биш вакыт намазын да калдырмый. Менә нинди алар “Кол Шәриф оныклары” хәрәкәтендә катнашучылар.

Рәсемнәрдә: финалда катнашучы егетләр

Хәлил ШӘРИПОВ,

Чаллы шәһәре

"Дин вә мәгыйшәт" газетасыннан

Намаз вакытлары

Иртәнге намаз
Кояш чыга
Өйлә намазы
Икенде намазы
Ахшам намазы
Ястү намазы
Яңалыклар архивы
Tatarstan.Net - все сайты Татарстана