Иске Чүпрәле авылы мәчетендә рәт-рәт тезелеп утырган ир-егетләрне күреп куанып куйдым. Аларның яртысы диярлек урта яшьтәгеләр. Укырга килүче хатын-кызларның чаршау артын тутырып утырулары җомга намазын тагын да хөрмәтле итте. Ул көнне район үзәгендә уныш бәйрәме иде. Халыкның мавыктыргыч бәйрәмгә бармыйча мәчеткә килүе илгә-көнгә тынычлык биреп, иген уңышын үстерергә һәм җыеп алырга насыйп иткән Аллаһы Сүбхәәнәһү вә Тәгаләгә олы рәхмәтен һәм ихтыяҗын белдерүе иде.
Җомга намазына кадәр Пәйгамбәребезгә (салләллаһу галәйһи үә сәлләм) 100 мәртәбә салават әйтелде, сәдакаләр өләшенде. Җомга хөтбәсе алдыннан район мөхтәсибе Рөстәм Рәкыйпов моннан бер ел элек һәлакәткә очраган “Боинг-737” очкычында һәлак булучыларны искә алды. Кешелекне тетрәндергән мондый афәтләрдән Аллаһ Раббыбыз сакласын, әрвахларның рухлары шат булса иде, дип теләде.
Җомга вәгазе садака турында булды. Халыкның дәррәү кубып, район үзәгендә салына башлаган җамигъ мәчеткә акча җыюын искә алсак, бу вәгазь бик урынлы булды. Җирле үзидарә башлыгы Фәрит Галләмовның эшне оештыра белүен дә әйтеп үтте хәзрәт. Һәр урамда билгеләнгән акча җыючыларга һәм хәләл акчаларыннан мәчет төзелешенә өлеш кертүчеләргә Аллаһ Раббыбызның рәхмәтләре явуын, биргән акчалары меңе белән үзләренә кайтуын теләде. Пәйгамбәребезнең (салләллаһу галәйһи үә сәлләм): “Аллаһны искә төшерә торган мәчет төзегән кешегә Аллаһы тәгалә җәннәттә йорт төзер”, - дип әйтүе бирелгән сәдакаларның Аллаһ каршында никадәр әҗерле булуын искәртә. Ел да мәчет салынмый. Бу да Аллаһның бер рәхмәте!
Җомга намазы соңында очкычта һәлак булган мөселман кардәшләр рухына һәм мәчеткә китерелгән садакаларга дога кылынды.
Сания ШӘРӘПОВА,
Чүпрәле районы
