Сорау: Әссәламү галәйкүм! “Әгузү биЛләһи мин әш-шәйтани-р-раҗим” сүзләрен Коръән укый башлаганда гына кулланасы, ә башка эшне башлаганда кулланмасаң да була, дип ишеткәнем бар. Дөрес фикерне ишетәсе иде.
Җавап: Үә галәйкүм әссәлам! Әйе, мәҗлесләр әдәбе буенча “әгузү биЛләһи мин әш-шәйтани-р-раҗим” сүзләрен кулланмасаң да ярый. Бу сүзләр Коръән укуны башлаган вакытта кулланыла. Бу турыда “Фәтава әл-Хиндия” китабында китерелә:
فَإِنْ أَرَادَ افْتِتَاحَ أَمْرٍ لَا يَتَعَوَّذُ، وَإِنْ أَرَادَ قِرَاءَةَ الْقُرْآنِ يَتَعَوَّذُ، كَذَا فِي السِّرَاجِيَّةِ. ص316 - كتاب الفتاوى الهندية - الباب الرابع في الصلاة والتسبيح ورفع الصوت عند قراءة القرآن
“Әгәр кеше берәр эш башларга җыенса, аңа истигаза әйтү кирәкми, ә Коръән укырга ниятләсә, истигаза әйтү тиешле була”. Бу турыда “Фәтава әс-Сираҗия” хезмәтендә дә язылган.
Шулай итеп, эш башлаганда истигазадан түгел, бисмилләһтән башлау хәерлерәк.
Ә Аллаһ яхшырак белүче!
