Сорау: Әссәламәгаләйкүм! Намаз вакытында, онытылып китеп, тәшәххүд урынына “әл-Фатиха” сүрәсен укысаң, ни була?
Җавап:
بِسۡـمِ ٱللَّهِ ٱلرَّحۡمَٰـنِ ٱلرَّحِيـمِ
Мәрхәмәтле һәм Рәхимле Аллаһ исеме белән. Вәгаләйкүм әссәлам вә рахмәтуллаһи вә бәрәкәтүһ.
Әгәр сез ялгышып тәшәххүд урынына “әл-Фатиха” сүрәсен укыгансыз икән, сезгә намаз ахырында сәҗдә сәхү кылырга кирәк. Чөнки сез хаталанып ваҗибны (“тәшәххүд” укуны) кичектергәнсез.
Нигезләмә:
عَنْ ثَوْبَانَ عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: "لِكُلِّ سَهْوٍ سَجْدَتَانِ بَعْدَ مَا يُسَلِّمُ"
يُنظر: سنن أبي داود، رقم الحديث: 1038.
Сәүбән тапшырган хәдистә болай диелә: Пәйгамбәр ﷺ: “Һәр хата аркасында сәлам биргәннән соң ике тапкыр сәҗдә кылу тиеш”.
Кара. "Сунан Әбу Дауд", №1038.
"لا يجب إلا بترك واجبٍ أو تأخيره"
يُنظر: "الهداية في شرح بداية المبتدي"، برهان الدين المرغيناني، 1/74.
"Ваҗибны калдыру яки кичектерү очрагында гына, [сәҗдә сәһү кылу] мәҗбүри.
Кара. "Әл-Хидая фи шәрх Бидая әл-мүбтади", 1/74.
Аллаһ - яхшырак Белүчедер.
Татарстан Республикасы мөселманнары Диния нәзарәтенең фәтвалар бүлеге (даруль-ифта).
