Бөгелмә районының “Плодопитомник” посёлкы хакимияте бинасында Кече Бөгелмә авыл җирлеге активистларының җыелышы узды. Әлеге чарада Бөгелмә һәм Бөгелмә районы имам-мөхтәсибе Рамил хәзрәт Хөснетдинов, Кече Бөгелмә авыл җирлеге башлыгы Сергей Хлопцев, посёлок халкы катнашты. Көн тәртибендә мәчет төзүне оештыру мәсьәләсе каралды.
Имам-мөхтәсиб җыелучыларга халыкны рухи-әхлакый сәламәтләндерү максатыннан мәчет төзүнең әһәмияте турында нәсыйхәт сүзләрен җиткерде. Шулай ук изге эш турында вәгазь укыды: “Мәчет төзелешенә һәм башка хәерле гамәлләргә кертелгән һәрбер ярдәм саф, ихлас ният белән Аллаһ ризалыгы өчен эшләнергә тиеш. Аллаһы Тәгалә Коръәндә мөселман өчен иң лаеклы гамәлләрнең берсе булып мәчет төзүне күрсәтә”, – дип билгеләде Рамил хәзрәт үзенең чыгышында.
Ул шулай ук посёлоктагы дини торыш турында хисап тотты. Аның сүзләренчә, 300 кеше яшәгән “Плодопитомник”та бер мәчет тә юк, мөселман гыйбадәтханәсен төзү буенча ихтыяҗ туды.
Җыелыш барышында посёлокта яшәүче бер кеше төзелеш алып бару өчен финанс чараларын булдыру артыннан йөрүне һәм киләчәктә мәчетне тоту мәсьәләләрен үз өстенә алуы турында белдерде.
Быел булачак мәчеткә нигез ташы салу ниятләнә.
