Бүген Югары Ослан районының яшүсмерләр-яшьләр клубында Мәрҗанигә багышланган чаралар узды. Җиде мәктәптән 60 якын бала, татар теле укытучылары, район үзәк китапханәсе һәм мәгариф бүлеге хезмәткәрләре катнашты. Әлеге чарада ТР мөселманнары Диния нәзарәтенең дәгъвәт юнәлеше җитәкчесе Нияз хәзрәт Сабиров чыгыш ясады. Мәрҗәнинең тормыш юлы һәм эшчәнлеге турында укытучылар һәм балалар сөйләде, ТР мөселманнары Диния нәзарәте төшергән документаль фильм күрсәтелде. Балалар ике төркемдә (I-IV кл.), (V-XI кл.) Шиһабетдин хәзрәт тормышына багышланган тест-викторинада ярышты, конкурста җиңүчеләргә бүләкләр тапшырылды.
Күптән түгел Мәрҗанигә багышланган зур чара Түбән Кама шәһәренең "Нур" мәчете мөгаллимәләре тарафыннан уздырылды. Шиһабеддин Мәрҗанигә багышлап, үзенчәлекле рухи дәрес үткәрделәр. Мөгаллимәләрнең һәркайсы татар халкы тарихында якты эз калдырган Мәрҗанинең сабыйлык елларына, тормыш юлына, фәнни хезмәтләренә, сәяхәтләренә аерым-аерым тукталды. Шиһабетдин хәзрәтләренең соңгы көннәре турында сөйләгәндә, күпләрнең күзендә яшь тамчылары ялтырады. Чәй табынында да Шиһабетдин Мәрҗанинең бай мирасы турында сүз барды...
Исегезгә төшерәбез, Үзәкләшкән дини оешма – Татарстан Республикасы мөселманнары Диния нәзарәте Президиумы бертавыштан 2018 елны Шиһабетдин Мәрҗани елы дип игълан итте. Мәшһүр татар галименең тууына 200 ел тулу уңаеннан быел бик күп чаралар үткәреләчәк.
