20 ноябрьдә Буа районы Килдураз авылы мәчетендә Мәүлид мәҗлесе узды. Кичәдә "Хаҗилар" мәчете имамы Фәһим хәзрәт Сөләйманов, яңа төзелеп килә торган мәчет имамы Шамил хәзрәт Вәлиуллин, авыл имам-хатыйбы Кадим хәзрәт Мөбарәкшин, авыл советы җитәкчесе Зөлфәт Әхәтов һәм авыл халкы катнашты.
Кадим хәзрәт мәҗлесне вәгазь-нәсыйхәт белән башлап җибәрде. Ул сөекле Пәйгамбәребез Мөхәммәд салләллаһу галәйһи вә сәлләмнең кешелек дөньясына әйтеп бетергесез зур йогынты ясаганы турында сөйләде. Шамил хәзрәт бөтен авылдашларын Мәүлид ае белән тәбрик итте, Пәйгамбәребез Мөхәммәд салләллаһу галәйһи вә сәлләмнең һәр үрнәген үзебездә булдырып яшәргә кирәклеген аңлатты, Буада яңа төзелеп килә торган мәчеткә үзләренең өлешләрен керткәннәргә рәхмәтен җиткерде. Мәүлид кичәсе мул табын артында дәвам итте.
