Шушы көннәрдә Татарстанның Әгерҗе районы мөхтәсибәтендә мөселманнар арасында мини-футбол буенча турнир уздырылды. Анда республиканың төрле районнарыннан, шулай ук Удмуртиядән барлыгы 12 команда көч сынашты. Уеннар “Олимп” спорт-сәламәтләндерү комплексында икенче тапкыр оештырылды.
Спортчыларны район башлыгы урынбасары Ришат Нурисламов һәм район имам-мөхтәсибе Габделкәрим хәзрәт Гыйззәтуллин сәламләде. "Бу безне берләштерә, якынайта, дуслаштыра торган бәйрәм", – диде Габделкәрим хәзрәт. Ришат Тимерович исә футболчыларга матур уен теләде.
Гомуми нәтиҗәләр буенча турнирда Әгерҗе командасы җиңү яулады. Икенче урында - Түбән Кама футболчылары. Сарапул командасы - өченче.
