20 сентябрь көнне Чистай районының Җүкәтау бистәсендә яңа мәчет ачылышы тантанасы узды. Әлеге чарада Чистай мөхтәсибе Мөхәммәд хәзрәт Кыямов, аксакаллар җитәкчесе Фәрит Мөзип улы, район башлыгы урынбасары Михаил Ксенофонтов, район мәчетләрендә хезмәт куючы имамнар, авыл халкы катнашты.
Тантаналы ачылыш Коръән аятьләре уку белән башланып китте. Алга таба мөхтәсиб ислам үсешенә зур өлеш керткәннәре өчен меценатларга рәхмәт сүзләрен җиткерде, Җәкәтау бистәсе мәчете имам-хатыйбы Галимхан хәзрәт Хисаметдиновны җаваплы вазифага керешүе белән тәбрикләде һәм мөхтәсибәт белән бердәм юнәлештә эшләргә чакырды.
Аннары тәкбир әйттеләр һәм мәчеттә намаз укыдылар. Ачылу тантанасы чәй эчү белән төгәлләнде, мәчеткә йөрүчеләр үзләренең хис-кичерешләре белән уртаклаштылар.
Мәчет өч ел дәвамында эшләп килә, әмма ачылыш тантанасы булмаган иде. Хәзер исә, Аллаһының ярдәме белән, мәчеттә дини дәресләр оештыру ниятләнә. Намазлар укыр өчен мәчет берьюлы 60лап кешене сыйдыра ала.
Хәзерге вакытта Чистай районында 25 мәчет эшли.
