Чистай районы мөхтәсибәтендә ел башында шәһәр мәчетләре имамнары авылларда дәгъват эшчәнлеген җәелдереп җибәргән иде. Хәзрәтләр быел ай саен 4 авыл халкы белән очрашырга ниятли. Февраль аенда 2 авылда очрашу узды.
Гадел хәзрәт Мөхәммәтшин Мөслим авылы халкы белән әңгәмә уздырды, үтәү өчен авыр булган дүрт изге гамәл турында вәгазь сөйләде.
Тимур хәзрәт Матвеев Татар Баганалысы авылында, кешеләргә бу фани дөньябызның вакытлыча гына булуын искә төшереп, мәңгелек йортыбыз турында сөйләде. Кылган гамәлләренә күрә, кешене анда нәрсә көткәнен бәян итте. Кыскача җәннәт, җәһәннәм, барзахта ниләр булуы турында мәгълүмат бирде.
Мондый чыгышлар, вәгазьләр авыл халкы күңеленә хуш килә, аларда рухи азыкка ихтыяҗ бик көчле.
