Казанның Ислам кабул итүгә 1000 ел исемендәге мәдрәсә шәкертләре һәм мөгаллимнәре татар теленнән белем тикшерү буенча дөньякүләм “Татарча диктант” акциясендә катнашты.
Чара алдыннан мәдрәсә җитәкчесе Ильяс хәзрәт Җиһаншин хәер-фатыйха бирде, татарча диктант язып белемнәрне тикшерүнең милли бердәмлегебезне, телебезгә мәхәббәтне белгертүче дөньякүләм акция икәнлеген ассысызыклап үтте. Аннан соң ул бүген Рөстәм Галиуллинның “Васыять” романының “Таҗеддин Ялчыгол” әсәреннән өзек язачакларын игълан итте. Таҗеддин Ялчыгол хәзрәтләре турында шәкертләрнең хәбәрдәрме-юкмы икәнлеген тикшерде, тормышы белән таныштырды, диктантта очраячак авыр сүзләрне төшендереп бирде.
Диктант текстын Ильяс хәзрәт Җиһаншин үзе укыды. Шәкертләр, белем алырга Россиянең төрле төбәкләреннән килеп, аларның татар телен белү дәрәҗәсе төрле булуга карамастан, барысы да, бу эшне игътибар белән, илһамланып башкарды. Диктант беткәч тә, хәзрәткә төрле сораулар бирделәр.
Әлеге мәдрәсәдә барлык дәресләр дә татар телендә алып барыла. Шулай итеп, уку йорты, «Татарча диктант» язу мәйданчыгына әверелеп, үзенең татар телле булуын тагын бер кат раслады.
