Рамазан ае алдыннан Буа районы имам-мөхтәсибе Илмир хәзрәт Хәсәнов 8-14 яшьлек малайлар арасында “Мәчетләрдә – 30 тәравих” дигән бәйге игълан иткән иде. Бу бәйгедә шәһәр һәм авыл балалары бик теләп катнашты. Җиңүчеләрне кичә Ураза бәйрәме көнне шәһәребезнең Үзәк паркында игълан иттеләр. Барлык катнашучыларга да бүләкләр бирелде. Ә иң активларына: “Әниләр”, “Тәкъва”, “Хаҗилар”, “Әбу Хәнифә” һәм Карлы авылы мәчетләренә тәравих намазларын бер дә калдырмый йөргән балаларга Илмир хәзрәт кулыннан велосипедлар тапшырылды.
“Әниләр” мәчете имамы Мөслим хәзрәт Кәримов әйтүенчә, “Әниләр” мәчетенә 12 бала бик теләп тәравих намазларына йөргән. Раян белән Гыймран да велосипедлы булдылар. Бу укучылар дәрестән соң Буа мәдрәсәсенә Коръән ятларга йөри. Әйтик, Гыймран Коръәннең яртысыннан артыгын, 16 җүзен ятларга өлгергән. Бу шәкертләргә уңышлар телибез!
