Гарәфә көнендә Гарәфә тавы итәгендә бер көнгә якын булганнан соң Татарстан хаҗиләре Мөздалифә үзәнлегенә юл алды. Гарәфәдәге вакыт гыйбадәттә, дога кылуда узды. Кояш баю белән юлчылар изге сәфәрне дәвам итте.
Мөздалифә - Мина һәм Гарәфә үзәнлекләре арасында урнашкан ташлы җирлек. Монда хаҗиләр ачык һавада бер төн кунарга тиеш. Шунысын да искәртеп узарга кирәк, Мина һәм Гарәфәдәге кебек чатырлар юк монда. Мөздалифәдә ачык һавада куну хаҗның иң авыр сынауларының берседер. Шайтанга атасы ташлар да нәкъ шушында җыелырга тиеш.
Татарстан хаҗиләренең хәлләре яхшы, күңелләре шат. Гарәфәдә алар җәмәгать белән дога кылганнан соң үз белдекләре белән дога кылуны дәвам итте. Әлбәттә, якыннары, туганнары, балалары өчен сәламәтлек сорады алар, гаиләләренә бәрәкәт һәм тынычлык, хәләл маллар теләде, ил-көннәр тыныч булсын дип дога кылды.
Данил Сәфәров, Арслан Ганеев.
