Бүген Татарстан мөфтие Камил хәзрәт Сәмигуллин Венада (Австрия) вөҗдан һәм дин иреге хокуклары сорауларына багышланган конференция башланганчы түгәрәк өстәлдә катнашты. Әлеге чара “Холокост һәм бу фаҗига вакытында яхүдиләрне коткарган мөселманнар” дип аталды. Түгәрәк өстәл Бөекбритания делегациясе тарафыннан оештырылды.
Чарада мөселманнарның сугыш елларында, ни кадәр куркыныч булуга карамастан, яхүдиләрне коткарулары, аларга үлемнән качарга ярдәм итүләре турында күп сандагы мисаллар китерелде. Холокост вакытында һәм хәзерге вакытта мөселманнар белән яхүдләр арасындагы мөнәсәбәтләр чагыштырылды.
Камил хәзрәт түгәрәк өстәлдә Татарстан мөселман өммәтенең православлар һәм яхүдләр белән хезмәттәшлегенә, үзара дустанә мөгалләмәдә булуларына игътибар юнәлтте. Республикада күп төрле дин һәм милләт вәкилләре яшәве хакында сөйләде. Җитәкчеләрнең динара, милләтара татулыкны саклау мәсьәләләренә җаваплы караулары турында әйтте.
***
Бу көннәрдә Татарстан мөфтие Камил хәзрәт Сәмигуллин Венада (Австрия) үткәрелүче вөҗдан һәм дин иреге хокуклары сорауларына багышланган конференциядә катнаша. Әлеге мөһим чара үтүче Хофбург конгресс үзәгенә Европаның куркынычсызлык һәм хезмәттәшлек буенча оешмасына кергән 57 илдән рәсми вәкилләр, дини оешмалар җитәкчеләре җыелды.
