Бүген Теләче районы үзәк мәчетендә "Гыйбәдәт исламия" китабы буенча викторинаның һәм Коръән уку бәйгесенең казыят туры үткәрелде. Әлеге чарада Татарстан мөселманнары Диния нәзарәтенең Коръәнне өйрәнү бүлеге җитәкчесе Илнур хәзрәт Хәйруллин, дәгъват бүлеге җитәкчесе Нияз хәзрәт Сабиров һәм башка дин әһелләре катнашты.
Нияз хәзрәт мөфти исеменнән катнашучыларны, аларның әти-әниләрен, остазларны сәламладе һәм гыйлем алу фазыйләтләре турында сөйләде.
Бәйгеләрдә Саба, Арча, Кукмара, Теләче, Балтач районнарында җиңүчеләр катнашты. "Гыйбадәте Исламия" китабы буенча викторинаның икенче турына 50гә якын бала килгән иде. Коръән уку буенча 15кә якын дин кардәшебез үзен сынап карады.
