Бүген Казанда “Милләт һәм динара мөнәсәбәтләрне җайлауның заманча гуманитар тәҗрибәсе” Россиякүләм фәнни-гамәли конференция ачылды. Конференциянең пленар утырышында Татарстан мөфтие урынбасары Рөстәм хәзрәт Хәйруллин, дәгъват бүлеге җитәкчесе Нияз хәзрәт Сабиров, ТР Иҗтимагый палатасы рәисе Анатолий Фомин, фән эшлеклеләре, Казан рухи семинариясе вәкилләре катнашты.
Рөстәм хәзрәт Хәйруллин конференциядә катнашучыларны сәламләде һәм Татарстан мөселманнары Диния нәзарәтенең күптөрле конфессияләр яши торган Татарстан җирлегендә милләтара һәм динара дустанә мөнәсәбәтләр корудагы тәҗрибәсе белән уртаклашты.
Конференция кысаларында бүгенге җәмгыятьтәге конфликтларны ачыклау һәм алар белән идарә итү; югары гуманитар технологияләр, гражданнарның җәмгыяви институтларын үстерүдә гуманитар тәҗрибәләр роле һәм башка сораулар карала.
Конференцияне РФ Иҗтимагый палатасының милләт һәм динара мөнәсәбәтләр медиациясе буенча эшлекле төркеме, ТР Иҗтимагый палатасы, В.Г.Тимирясов исемендәге Казан инновацион университетының Социаль фәлсәфә фәнни-тикшеренү институты оештырды.
