Казанда Россия һәм Ислам хезмәттәшлеге оешмасы илләренең "KAZANSUMMIT 2017" IX халыкара Икътисади саммит кысаларында үткәрелгән "ММЧ-онлайн: социаль челтәрләрдә экстремизм профилактикасы” темасына халыкара фәнни-гамәли конференциянең резолюциясе кабул ителде. Конференция эшендә дин галимнәре һәм экспертлар, Россия һәм чит ил журналистлары, галимнәр һәм сәясәт белгечләре катнашты.
Резолюциядә журналистлар, дин һәм IТ-технология белгечләре өчен экстремизмга каршы тору өчен (шул исәптән социаль челтәрләрдә дә) уртак платформа булдыру кирәклеге турында әйтелә. Монардан тыш, журналистларга һәм блогерларга конфессияара мөнәсәбәтләрне җайга салуга юнәлдерелгән уртак проектлар эшләү кирәклегенә аерым басым ясала.
Документта шулай ук журналистлар тарафыннан исламга кагылышлы төшенчәләр белән сак кулланырга кирәклеге һәм үз максатларында файдаланырга ярамаганлыгы хакында әйтелә. Резолюция авторлары фикеренчә, корреспондент киң җәмәгатьчелеккә террористларның фикерләрен трансляцияләүдә катнашмаска һәм милләтара низаглар тудырмаска тиеш. Документта массакүләм мәгълүмат чараларына киңәш алу өчен рәсми дин вәкилләренә һәм ышанычлы интернет чыганакларга таянырга кирәклеге турында да ассызыклана.
