Бөтендөнья татар конгрессының VI съездында БТК башкарма комитеты рәисе Ринат Закиров хисап доклады белән чыгыш ясады. Ике съезд арасында башкарган эшләргә, яңа барлыкка килгән проектларга күзәтү ясалды. Аерым басым татар мәгарифе торышына бирелде.
Шулай ук ТР мөселманнары Диния нәзарәтенең милли мирас һәм рухи-әхлакый кыйммәтләрне саклау һәм үстерүдә зур өлеш кертүе турында да әйтелде. Конгресс рәисе: "Татарстан мәчетләрендә җомга вәгазьләрен татар телендә уку турындагы мөфтиятнең карары татар телен саклауның көчле ысулы булып тора", - диде. Ул мәчетләрдә татарча сөйләмне күбрәк ишетеп булачагына өметләнеп калды.
«Татарларның үз телләре, мәдәнияте һәм динен корбан итәргә хакы юк. Бу - хыянәт булыр иде", - дип белдерде Ринат Закиров.
