Бүген "Мәрҗани" мәчетендә тантаналы төстә Казан ислам коллиятенә беренче курска укырга керүче шәкертләргә студент билетлары тараттылар. Быел мөселман уку йортына 10 татар егете кабул ителгән. 4 ел дәвамында алар тирәнтен ислам фәннәрен үзләштерәчәк, ә укып бетергәч "имам-хатыйб" һәм "ислам дине нигезләре һәм гарәп теле мөгаллиме" дигән квалификация алачак.
Истәлекле вакыйгада мөфтинең урынбасары, коллият директоры Мансур хәзрәт Җәләлетдинов та катнашты. Ул шәкертләргә үзенең үгет-нәсихәтләрен ирештерде, уңышлар теләде һәм студент билетлары белән бергә кәләпүшләр дә таратты.
