Бүген Теләче районы Олы Мәтәскә авылында мәчет ачылды. Әлеге мәчетне шушы авылдан чыккан эшмәкәр Миләүшә Сәлахетдинова төзеткән. Мәчеттә бөтен шартлар тудырылган. Гыйлем алу өчен дә урыннар әзерләнгән. Шушы мәчет ачылышында Теләче районы башлыгы Илдус Зарипов, имам-мөхтәсиб Исмәгыйль хәзрәт Фәләхиев, авыл халкы катнашты.
Катнашучыларны Татарстан мөфтие исеменнән ТР мөселманнары Диния нәзарәте дәгъвәт бүлеге җитәкчесе Нияз хәзрәт Сабиров сәламләде. Ул мөселманның тормышында мәчетнең әһәмияте турында вәгазь сөйләде. “Мәчет ул – гыйбадәт урыны гына түгел, ул элек-электән гыйлем алу урыны да булып хезмәт иткән. Пәйгамбәребез Мөхәммәд салләллаһу галәйһи вә сәлләм хәдисендә: “Кем гыйлем алу юлына чыкса, Аллаһы Тәгалә аңа җәннәткә илтүче юлны җиңеләйтер. Аның өчен бөтен мәхлуклар дога-истигъфар кылырлар”, – диелгән”, – дип мөрәҗәгать итте Нияз хәзрәт һәм Татарстан мөфтие исеменнән шушы мәчетне төзегән Миләүшә ханым Сәлахетдиновага, шулай ук шушы мәчетнең имамына рәхмәт хатлары тапшырды.
