Кичә Нурлат мөхтәсибәте районның Дуслык йортында Мәүлид бәйрәме уздырды. Дин кардәшләребезне Пәйгамбәребез Мөхәммәд салләллаһу галәйһи вә сәлләмнең туган көне уңаеннан үткәрелә торган чара белән котларга Татарстан мөфтие Камил хәзрәт Сәмигуллин, Нурлат районы башлыгы Равил Афраил улы Кузюров, Бөтендөнья татар конгрессының Казан бүлеге җитәкчесе, Казанда “Нурлат” якташлык җәмгыяте рәисе Фәрид Мифтахов, Болгар ислам академиясе мөгаллиме, шәйх Исмәгыйль Бүлбүл, Ислам динен кабул итүгә 1000 ел исемендәге Казан югары мөселман мәдрәсәсе мөдире Ильяс хәзрәт Җиһаншин катнашты.
Бәйрәмдә Рәсүлебез салләллаһу галәйһи вә сәлләмне искә алып, аның хөрмәтенә Коръән сүрәләре һәм догалар укылды, вәгазьләр сөйләнде, мөнәҗәтләр әйтелде.
