Бүген бөтен дөнья ап-ак карга төренгән көндә “Добрый фудтрак” һәм Татарстан мөселманнары Диния нәзарәтенең “Зәкят” хәйрия фонды Казан шәһәренең Колхоз базары янындагы скверда 60 йортсыз кешегә бушлай кайнар аш өләште. “Азу” татар кухнясы ярдәме белән бүгенге меню яңа кәбестәдән әзерләнгән харчодан, токмачтан, булкадан һәм компоттан гыйбарәт булды.
Хәйрия ашлары Татарстан мөселманнары Диния нәзарәтенең “Зәкят” хәйрия фонды өчен матур традициягә әверелде. Фонд хезмәткәрләре кайнар аш белән сишәмбе һәм җомга көннәрендә илледән артык мохтаҗ кешене тукландыра ала. Моннан тыш, “Добрый фудтрак” күбрәк санда йортсыз кешеләрне ашату мөмкинлегенә ия. Моның өчен Татарстан мөселманнары Диния нәзарәтенең “Зәкят” хәйрия фонды барлык битараф булмаган кешеләрне аш таратылу урыннарына кадәр шәһәр җәмәгать транспорты белән бару өчен юл хакын түләргә чакыра, чөнки йортсыз кешеләрнең күбесе, акчалары булмау сәбәпле, скверга кадәр килеп җитә алмый. Аллаһы Тәгалә барлык хәйриячеләргә дә ике дөнья бәхет-сәгадәтенә ирешүне насыйп итсә иде.
Мохтаҗларны тукландыруда катнашырга теләүчеләрнең 225-33-22 телефон номерына шалтыратуларын сорыйбыз.
