Татарстан мөфтие Камил хәзрәт Сәмигуллин җитәкчелегендә Татарстан мөселманнары Диния нәзарәте делегациясенең Мәккәдә “Әл-Хәрәм” мәчете имам-хатыйбы Габдеррахман әс-Судайс белән очрашуы төн якынлашканда соң гына төгәлләнде. Мөселманнарның иң изге, иң кадерле һәм дөньяның иң зур мәчетләренең башлыгы Согуд Гарәбстаны Короле Сәлман ибн Габдел-Газиз Әл Сауд исеменнән сәламләде. Рәсми төстә башланып киткән очрашу соңыннан бик җылы, ачык һәм эчтәлекле булды. Кунаклар да, имам үзе дә барлык дин кардәшләребезнең, Җир шарының кайсы почмагында яшәвенә карамастан, бердәмлектә һәм теләктәшлектә булырга тиеш дип ассызыкладылар.
Әңгәмә шактый озак вакыт барды, төнлә генә тантаналы кичке аш белән тәмамланды.
