Бүген Камил хәзрәт Сәмигуллин Оманнан килгән сәяхәтчеләр белән очрашты. Алар футбол буенча дөнья чемпионаты узган шәһәрләргә сәфәр чыкканнар. Oman.Bikers клубы әгъзалары 23 июньдә Оман башкаласыннан үз машиналарында Россиягә юнәлгәннәр, Гарәп Әмирлекләре аша Иранда, аннары Әзербайҗанда, Дагстанда, Чечняда булганнар. Сәяхәтчеләр бик зур кызыксыну белән төрле шәһәрләрнең үзенчәлекләре, мөселман мирасына караган рухи кыйммәтләр белән танышалар.
Камил хәзрәт сәяхәтчеләрне Татарстан мөфтиятенең эшчәнлеге белән таныштырды, ислам диненең үсеше, бай дини мирасыбыз турында сөйләде. Һәрбер сәяхәтчегә истәлеккә Коръәннең Казан басмасын бүләк итте.
Абдулла Әл Заҗали, Хәтим Әл Саегх һәм Муханнед Әл Хәсәни – Oman.Bikers клубы әгъзалары. Сәяхәтчеләрнең сүзләренә караганда, бу аларның беренче генә сәфәрләре түгел. Моңа чаклы алар Европада, Кытайда һәм хәтта Австралиядә булганнар.
