Кичә Әгерҗе районы Тирсә авыл җирлегенә караган унлап кына хуҗалыгы булган Чишмә авылында зур вакыйга булды – “Чишмә нуры” дип аталган мәчет ачылды.
Әлеге Аллаһы йортын төзүдә башлап йөрүчеләр – моннан берничә ел элек бирегә килеп төпләнгән Корбановлар гаиләсе, аерым алганда, гаилә башлыгы Ринат Корбанов.
– Элегрәк елларда авыл халкы дини бәйрәмнәрдә әлеге гаиләнең йортына җыела иде, хәзер Аллаһы йортына килерләр, – диде авыл җирлеге башлыгы Рафил Закиров.
Чишмәлеләрнең шатлыгын уртаклашырга Әгерҗе район имам-мөхтәсибе Габделкәрим хәзрәт Гыйззәтуллин, күрше Менделеевски районы мөхтәсибе Ирек хәзрәт Нуриев, авыл имамнары, тирә-як авыллардан кардәшләребез килгән иде.
Тантаналы чара Корбановларның төпчек уллары, 5 яшьлек Яхъяның Коръән укуы белән башланып китте. Коръән һәм догалар уку, бик тә тирән эчтәлекле вәгазьләр тыңлау белән үрелеп барган чара яңа мәчеттә бердәм намаз уку һәм ачык һавада пешкән пылаудан авыз итү белән тәмамланды.
