Бүген, 30 октябрьдә, Россиядә сәяси репрессия корбаннарын искә алу көне билгеләп үтелә. Казанның Архангел зиратындагы Истәлек комплексы янында киң җәмәгатьчелек һәм дин әһелләре катнашында традицион матәм чарасы уздырылды. Анда катнашучылар һәлак булган тоткыннарны бер минут тынлык белән искә алды. Галиев мәчете имамы Тимергали хәзрәт Юлдашев Изге Коръән аятьләре укыды һәм сәяси репрессия корбаннары рухына дога кылды.
Сәяси репрессия елларында атып үтерелгән, соңрак реабилитацияләнгән ватандашларыбызның тугандаш каберен символлаштырган әлеге мемориал 1998 елның 30 октябрендә Архангел зиратында ачылды. Ул һәлак булганнарның шартлы рәвештә күмелгән урыны булып санала. Истәлек такталарында 2762 фамилия язылган. Алар арасында элеккеге Советлар Союзы, шулай ук чит ил гражданнары да бар.
