Бүген, җөмәдәл-ахырның 8нче көнендә, ягъни 13 февраль көнне, 19.30 сәгатьтә Татарстан мөфтие Камил хәзрәт Сәмигуллин Казанның "Гаилә" мәчетендә вәгазь кичәсе уздырачак. Татарстан мөселманнары башлыгы белән турыдан-туры аралашуга мәчет мәхәлләсе һәм барлык теләүчеләр чакырыла. Камил хәзрәт Сәмигуллин үзенең ачык дәресендә ислам дине кыйммәтләре, гаилә мәсьәләләренә караган сорауларга аңлатмалар бирер, дип көтелә. Моннан тыш, мөфти хәзрәткә һәркем үзен кызыксындырган башка сорауларны да бирә алачак. Мәчет адресы: Җәүдәт Фәйзи урамы, 2 нче йорт. Керү ирекле.
Мөфтинең очрашуы “Гаилә” мәчетендә һәр ай саен үтә торган Татарстанның танылган дин әһелен яисә мөселман галимен чакырып, вәгазь кичәләре үткәрү кысаларында уза. Күренекле шәхесләр, галимнәр белән очрашуларның әһәмиятен билгеләп, “Гаилә” мәчете имам-хатыйбы Рөстәм хәзрәт Хәйруллин: “Вәгазь кичәләре мәхәллә кешеләре арасында бердәмлек, дуслык-татулык, кардәшлек мөнәсәбәтләрен ныгытучы чаралар булып хезмәт итәләр. Без күренекле затлар белән очрашуда вәгазь-нәсыйхәт сүзләрен ишетеп кенә калмыйбыз, аны тормышыбызда нигез итеп алып, яшәешебезгә кертеп җибәрәбез. Ислам рухи кыйммәтләрен яшь буынга тапшыруда үтемле һәм эчтәлекле ачык лекцияләрнең роле бик зур”, – дип билгеләп узды.
