Бүген, җөмәдәл-ахыр аеның 21-нче көнендә, Чистайның “Иман” мәчетендә хатын-кызлар арасында шәһәркүләм Коръән укучылар бәйгесе үткәрелде. Бәйге 100дән артык катнашучыны җыйды, аларның барысы да – мөхтәрәм мөгаллимә Әминә ханым Нуруллова шәкертләре.
Сәламләү сүзләре белән катнашучыларга “Иман” һәм “Әниләр” мәчетләре имам-хатыйблары Гадел хәзрәт Мөхәммәтшин һәм Алмаз хәзрәт Сафиуллин мөрәҗәгать итте. Алар Әминә ханымны мөгаллимлек итә башлавына 25 ел тулу белән тәбрикләп, аңа чәчәкләр һәм район имам-мөхтәсибе Мөхәммәд хәзрәт Кыямов исеменнән Рәхмәт хаты тапшырды.
Катнашучылар чиратлап бер сүрәне яттан сөйләде һәм Коръән укып күрсәтте. Аларның чыгышларын Чистай мөхтәсибәте мөгаллимәләре – Илһамия Шәрифуллина, Рамилә Хәйбуллова, Миңнегөл Шәйдуллина һәм Рәисә Зәйнуллина бәяләде.
Бәйге нәтиҗәләре буенча барлыгы 10 җиңүче билгеләнде. Аларга кыйммәтле бүләкләр һәм дипломнар тапшырылды.
Чара җәмәгать белән өйлә намазын уку һәм чәй өстәле белән төгәлләнде.
