Бүген, Шәгъбан аеның 3-нче көнендә, Буа районында Казыйлар шурасының чираттагы күчмә утырышы уздырылды. Республиканың баш казые Җәлил хәзрәт Фазлыев җитәкчелегендә үткән әлеге утырышта Татарстанда Рамазан аен үткәрүгә кагылышлы аерым карарлар кабул ителде.
Әйтик, казыйлар ураза башлану көнен, республика мәчетләрендә беренче тәравих намазын уку тәртибен, фитыр, фидия сәдакалары һәм зәкят нисабының минималь күләмен билгеләде.
Төгәл даталар, намаз вакытлары һәм сәдакалар күләме, Татарстан мөфтие Камил хәзрәт Сәмигуллин тарафыннан расланганнан соң, киң җәмәгатьчелеккә җиткереләчәк.
Моннан тыш, күчмә утырыш кысаларында казыйлар Буа мәдрәсәсе шәкертләре һәм авыл имамнары белән очрашты.
