Үткән ял көннәре спорт чараларына да бай булды. Әлеге чаралар шәһәр халкы арасында актив сәламәт яшәү рәвешен популярлаштыру максатыннан оештырылды. Казан шәһәренең Киров һәм Мәскәү районы мөхтәсибәте “Сәлам Рамазан” дип исемләнгән Спартакиада үткәрде. Әлеге чара мөхтәсибәткә керүче мәчет хезмәткәрләре һәм мәчеткә йөрүчеләр катнашында узды. Катнашучылар “Ярдәм” мәчете янәшәсендәге спорт мәйданчыгында көч сынашты. Программага 6 спорт төре кертелгән иде: дартс, урыннан ераклыкка сикерү, таяк тартышу, турникта тартылу, канат тартышу һәм эстафета. Шулай итеп, барлыгы 11 команда үзләренең чыдамлыкларын, көчләрен, осталыкларын һәм җитезлекләрен күрсәтү буенча көч сынашты. Ярыш нәтиҗәләре буенча “Ярдәм” мәчете командасы абсолют җиңүче булып танылды, икенче һәм өченче урыннарда “Җомга” һәм “Мәүлид” мәчетләре. Оештыручылар һәм катнашучылар әлеге Спартакиаданың Рамазан ае алдыннан үтүен һәм уразага рухи һәм физик яктан әзерләнергә ярдәм итүен ассызыклап уздылар.
Якшәмбе көнне Теләчедә мөселман командалары арасында мини-футбол буенча ярышлар оештырылды. Әлеге ярышта Чистай мөхтәсибәте командасы ярымфиналда Түбән Кама районын җиңде. Аннары финалда Саба районы командасы белән очрашты һәм аны 3:2 исәбе белән отты. Беренче урын алган Чистай командасына спорт кирәк-яраклары алу өчен акчалата бүләк тапшырылды.
