Татарстан мөселман уку йортларында кабул итү кампаниясе башланып китте: дини белем алу нияте белән абитуриентлар мәдрәсәләргә килә. Кичәге мәктәп укучылары гаризаларын көндезге бүлеккә бирсә, олырак яшьтәгеләр кичке һәм читтән торып уку мөмкинлеген карый. Гомумән, быел республиканың мөселман уку йортлары көндезге бүлеккә 400-дән артык шәкерт кабул итәргә әзер, кичке һәм читтән торып уку бүлекләрендә 750 кеше өчен урын каралган.
Бүгенге көндә Татарстанда күп баскычлы дини мәгариф системасы гамәлдә. Башлангыч белемне мәчетләр каршындагы курсларда алып булса, урта белемне мәдрәсәләр, югары белемне Россия ислам институты / Казан ислам университеты (бакалавриат, магистратура) һәм Болгар ислам академиясе (магистратура, докторантура) бирә.
Татарстан мәдрәсәләрендә урта һөнәри мөселман белем стандарты шулай ук башлангыч, нигезле һәм югары дәрәҗәдәге белем бирә. Стандартка "Гарәп теле", "Дин тарихы", "Психология һәм педагогика", "Хокук нигезләре", "Татар теле һәм әдәбияты", "Татарстан һәм татар халкы тарихы", "Россиядә ислам тарихы", "Ислам дине тәгълиматы", "Коръәнне уку һәм ятлау", "Коръәнне уку кагыйдәләре (тәҗвид)", "Коръән белеме", "Коръән тәфсире", "Гыйбадәт кылу нигезләре", «Ислам хокукы", "Мөхәммәд пәйгамбәрнең ﷺ тормыш юлы", "Хәдис белеме", "Мөхәммәд пәйгамбәрнең ﷺ сүзләре", "Вәгазь уку нигезләре һәм имамның бурычлары", "Исламның дини агымнары", "Ислам фәннәрен укыту методикасы", "Әхлак", "Ислам тарихы", "Мантыйк" кебек дәресләр керә.
Татарстанның мөселман уку йортларындагы көндезге бүлегендә "нигезле" дәрәҗәдәге белем 3 ел дәвамында укуны күз алдында тота, "югары" дәрәҗә – 5 ел. Мәдрәсәләрнең күбесе "нигезле" укыту программасы буенча белем бирә.
Мәдрәсәләр абитуриентларга дин әһеле һәм мөселман дини оешмалары хезмәткәре белгечлеген алырга тәкъдим итә. Укып чыгучыларга "Имам-хатыйб", "Ислам нигезләре һәм гарәп теле укытучысы", "Гарәп теле укытучысы һәм тәрҗемәчесе" квалификацияләре тапшырыла. Дини белемнән тыш, шәкертләр өстәмә һөнәри белемгә дә ия булалар (умартачы, автомобиль йөртүче, тегүче һ.б.). Кайсыбер мәдрәсәләр үз шәкертләренә югары уку йортлары белән хезмәттәшлек нигезендә читтән торып параллель рәвештә югары дөньяви белем алу мөмкинлеген дә бирәләр. Мәдрәсәдәге "Нигезле" программаны үзләштереп, укуны Казан ислам университетында югары дини белем алып дәвам итәргә мөмкин. Көндезге бүлектә уку дәвере 4 ел тәшкил итә, читтән торып уку (бакалавриат) 5 ел дәвам итә. Мәдрәсәдә укып чыкканнар тизәйтелгән укыту курсын үтәргә мөмкин. Россия ислам институты яки Казан ислам университетын тәмамлаучылар магистратурага керә ала. Югары сегментта укуны тәмамлаганнан соң, белем алуны чит ил ислам вузларында дәвам итү, шулай ук стажировкалар узу мөмкинлеге бар.
Студентларга уку дәверендә тулай торакта бушлай урын һәм ашау каралган, кайсыбер мәдрәсәләрдә спорт төрләре буенча түгәрәкләр эшли. Мәдрәсәләрдә югары квалификацияле, югары дөньяви һәм дини белемгә ия белгеч-укытучылар укыта.
Көндезге уку бүлекләренә керү өчен кабул итү комиссиясенә түбәндәге документлар тапшырыла:
- үрнәк буенча мәдрәсә директоры исеменә гариза;
- үрнәк буенча анкета
- паспорт копиясе (1 бит һәм прописка)
- 086 формасы буенча медицина белешмәсе
- 026 формасы (прививкалар ) буенча шәхси медицина картасы
- Фото 3x4 — 4 шт.
- Белем турында документ (оригинал).
- мөхтәсибәттән (Татарстан Республикасы өчен) яки Диния Нәзарәтеннән (чит шәһәрләрләр өчен) юллама.
Документлар 1 августка кадәр эш көннәрендә 9.00-дән 15.00-га кадәр кабул ителә.
Каблу итү имтиханнары түбәндәге предметлар буенча уздырыла:
Татар теле - инша, изложение; рус теле — тест (яки БДИ нәтиҗәләре буенча)
Россия тарихы - тест (яки БДИ нәтиҗәләре буенча)
Ислам нигезләре - әңгәмә.
Көндезге бүлеккә укырга 9 яки 11 сыйныфларны тәмамлап чыккан 15 яшьтән алып кызлар һәм егетләр кабул ителә.
Кичке һәм читтән торып уку бүлекләренә урта (тулы) гомуми, урта һөнәри яки югары белемгә ия ир-атлар һәм хатын-кызлар кабул ителә. Уку дәвере 4 елы тәшкил итә. Документлар 2019 елның 5 августына кадәр эш көннәрендә 9.00-15.00 сәгатьләрдә кабул ителә. Керү имтиханнары августта башлана.
Казан ислам университетының Коръән хафизлар әзерләү үзәге дә "Дини оешмалар өчен имамнар һәм дини хезмәткәрләр әзерләү" юнәлешендә "Коръән гыйлеме" профиле буенча яңа 2019/2020нче уку елына студентлар кабул итә башлады. Әлеге юнәлеш 4 ел дәвамында Коръәнне тулысынча яттан өйрәнү һәм Корьән гыйлеме бакалавры квалификациясе алу мөмкинлеге бирә.
Укырга алганда төп таләпләр:
– гомуми урта белем (11 класс),
– Россия гражданы булу,
– яшь 30дан артмау.
Керү имтиханнары:
– рус теле,
– Коръәннең 30нчы җүзен яттан белү,
– Ислам нигезләре.
Документлар 1 августка кадәр кабул ителә. Белешмәләр өчен телефон: 8 (843) 251-01-55.
Е-мейл - ucheb.otdel_riu@mail.ru. Вконтакте: https://vk.com/centerxafizov
Кабул итү көннәре һәм кагыйдәләре, шулай ук сынау имтиханнары турында тулырак мәгълүматны http://magarifrt.ru сайтында алырга була.
