Бүген, шәүвәл аеның 30 нчы көнендә, Тукай районы имамнары җыелышы узды. Әлеге чарада Татарстан мөфтиенең мөхтәсибәтләр (җирлекләр) белән эшләү буенча киңәшчесе Равил хәзрәт Зөфәров, Тукай районы Башкарма комитеты җитәкчесе Ленар Авзалов, район имам-мөхтәсибе Җәүдәт хәзрәт Харрасов һәм имамнар катнашты.
Көн тәртибендә төп мәсьәлә буларак барлык имамнарга шәһадәтнамәләр тапшырылды. Утыздан артык имам Татарстан мөфтиенең мөхтәсибәтләр (җирлекләр) белән эшләү буенча киңәшчесе Равил хәзрәт Зөфәров кулыннан дини эшчәнлек алып бару буенча бирелә торган төп документ – шәһадәтнамәне яңарттылар. Очрашу барышында дин әһелләре шулай ук җитәкчеләргә төрле сорауларын бирде, үтенеч-гозерләрен җиткерде. Аерым алганда, мәчетләрне төзекләндерү, документларны алып бару тәртипләре буенча сораулар каралды.
