Бъген, җөмәдәл-ахир аеның 23-нче көнендә (17-нче февральдә), Татарстан мөселманнары Диния нәзарәтенең Аксакаллар шурасы рәисе Айрат хәзрәт Әюпов Татарстан Республикасы яшьләр эшләре министрының беренче урынбасары Тимур Сөләйманов белән күреште. Очрашу министрлыкта узды һәм бер сәгатьтән артык дәвам итте. Беренче чиратта Айрат хәзрәт Тимур Җәүдәт улына җылы каршылавы, бар көчен, белемен, тырышлыгын куеп яшьләр сәясәте өлкәсендә ару-талуны белми эшләве өчен рәхмәт сүзләрен җиткерде. Алга таба Айрат хәзрәт Әюпов Тимур Сөләймановны Татарстан мөфтиятенең эшчәнлеге белән таныштырды, аеруча Аксакаллар шурасы, социаль бүлек тарафыннан алып барылган проектлар турында сөйләп узды.
– Татарстанның һәрбер районында мөхтәсибәтләр бар, аларда яшьләр бүлекләре, Аксакаллар шурасы эшли. Шуны күздә тотып, Яшьләр эшләре министрлыгы белән килешү төзергә тәкъдим итәм, шушы килешү нигезендә барлык эшләрне дә бергә эшләү турында вәгъдә бирәм. Без яшьләргә мирас калдырырга тиешбез. Әлбәттә, мәчетләребезгә намаз укучы яшьләребез килә. Тик безгә дини булмаган яшьләр белән эшләргә, аларны татар милләте, динебез, мирасыбыз белән кызыксындырырга кирәк. Килешү нигезендә, министрлык белән әлеге юнәлешләрдә эш алып барырга ниятлибез.
Тимур Сөләйманов Айрат хәзрәтнең идеяләрен хуплады һәм якын арада килешүне имзаларга сүз бирде.
