Изге Рамазан ае алдыннан беренче мөселман телевидениесе «Хозур ТВ» тамашачылар өчен махсус тапшырулар әзерләде. Яңартылган тапшырулар челтәре 24 марттан башлана.
Әйтик, тамашачылар уразага әзерләнү буенча рус телендә “Готовимся к Рамадану” һәм татар телендә “Фарыз Ураза” дип аталган тапшыруларны карый алачак.
Шулай ук танылган медиашәхесләр катнашында “Минем Рамазан” видеороликлар циклы әзерләнде, тапшыруда катнашучылар Рамазан ае уразасын тоту тәҗрибәсе һәм истәлекләре белән уртаклашачак.
“Продуктивный Рамадан” тапшыруында табиблар медицина күзлегеннән уразаның файдасы, төп кагыйдәләре турында сөйләячәк, киңәшләр бирәчәк.
Татарстан мөселманнары Диния нәзарәтенең “Хозур ТВ” телеканалы (huzurtv.ru) – олылар һәм балалар өчен рус һәм татар телләрендә тәүлек буе рухи-агарту тапшырулары концепциясен гәүдәләндергән беренче мөселман телеканалы. Аудиториясе – 1 000 000 йорт, YouTube каналында 800 меңнән артык язылучы. “Хозур ТВ” Россиянең иң зур мөселман медиахолдингы – ТР мөселманнары Диния нәзарәтенең “Хозур” нәшрият йорты составына керә.
