Бу көннәрдә Татарстан мөфтие Камил хәзрәт Сәмигуллин – Татарстан Республикасы Президенты Р.Н.Миңнеханов җитәкчелегендәге рәсми делегация составында эш визиты белән Босния һәм Герцеговинада. Бүген, Рамазан аеның 2 нче көнендә, мөфти Татарстан Республикасы Президенты Рөстәм Миңнеханов белән бергә Сараеводагы Гази Хөсрев-бега мәчетендә булды.
Анда Рөстәм Миңнеханов һәм Камил хәзрәт Сараево имамы һәм мәчетнең баш имамы Менсур Малкич белән очрашты. Гази Хөсрев-бега мәчете Босния һәм Герцеговинада госманлылар чорына караган иң әһәмиятле архитектура һәйкәле булып санала. Бу дөньяда электр үткәрелгән беренче мәчет булып тора.
2013 елның октябрендә узган халык санын алу нәтиҗәләре буенча, илдә 3,83 млн кеше яши. Аларның 45% ы – Ислам, 31% ы – христианлык – православие, 15% ы католицизм динен тота.
"Татмедиа" агентлыгы материаллары буенча.
