Бүген, Халыкара балаларны яклау көне алдыннан, Нәзарәтнең “Зәкят” хәйрия фонды “Дуслык” приюты карамагында тәрбияләнүче балалар өчен әлеге истәлекле көн уңаеннан тематик мәҗлес оештырды. Балалар өчен хәйрия чарасы Казанның “Ханума” кафесында, аның хуҗасы Гүзәл Ибраева ярдәме белән узды. Биредә әти-әни тәрбиясеннән мәхрүм калган 10-17 яшьлек 30 бала җыелды.
Халыкара балаларны яклау көне уңаеннан алар өчен викториналар, конкурслар, аш-су буенча мастер-класслар узды, тәм-томнар әзерләнде. Бәйрәмнең иң истә калган мизгеле – балалар белән ихлас әңгәмә булды, аны “Тормыш кагыйдәләре” темасына “Бәхет ачкычы” иҗат төркеме җитәкчесе Ләйсән ханым үткәрде.
Пицца әзерләү буенча мастер-класс аеруча зур кызыксыну уятты, балалар ризык әзерләде һәм аны татып карады.
