Баулы районы Исергәп авылы мәчетендә махсус хәрби операция солдатлары өчен гуманитар ярдәм җибәрү өчен әзерлек башланды. Кичә егермегә якын авыл халкы – абыстайлар, укытучылар, лаеклы ялда булучылар, “Ак калфак” оешмасы активистлары әлеге хәйрия акциясендә катнашу өчен җыелды һәм токмач кисте. Иң өлкән катнашучыга 78 яшь иде. Алар барысы да бердәм булып тырышып эшләде: берсе камыр басты, икенчеләре камыр җәйде, калганнары токмач кисте.
Шунысы күркәм: районда яшәүче бер эшмәкәр онны үз хисабына бирде. Исергәп авылы мәчете имам-хатыйбы Камил хәзрәт Шәмсуаров шәхси эшмәкәрләр Айгөл һәм Газинур Латыйповларга, авылның өлкән абыстае Сәлия Мәҗитовага битараф булмаулары өчен рәхмәтен җиткерде.
Акция дәвам итә: авыл мөслимәләре ял көннәрендә янә токмач кисәчәк. Алар шулай ук йон оекбашлар бәйли, дару үләннәрен пакетларга тутыра.
Баулы районы имам-мөхтәсибе Әнвәр хәзрәт Хәмитов сүзләренә караганда, мондый хәйрия акциясе Баулы шәһәренең “Гали” Үзәк мәчетендә дә уза. Биредә квартал саен мәчет активистлары һәм волонтерлар 50-70 пар оекбаш бәйли, татлы ризыклар (чәк-чәк, бавырсак) әзерли, томалап пешерелгән ит һәм казылык алып килә. Акциядә 30га якын хатын-кыз катнаша. Моңа охшаш башлангычлар Баулы районы Татар Кандызы авылы мәчетендә дә алып барыла.
