Универсиадада катнашучы 1 мең мөселман спортчысының 50гә якыны ураза тота. Алар арасында Нигерия, Малайзия, Мисыр һәм Иран яшьләре бар. “Ураза тотуның фарыз булуы хакында Коръәндә язылган. Шуңа кайда гына булсак та, ураза тотачакбыз. Һава торышы да яхшы, көндез эссе булса да, кичен салкынча”, – ди Иран спортчысы Баһадур Мулаи.
Мулаи – дөнья һәм Азиянең 4 медальенә ия спортчы, 105 килодан артык авырлыкта чыгыш ясый. Универсиадада беренче тапкыр катнаша. Олимпия уеннарында да чыгыш ясарга тели. Мөмкинлек туган очракта, ул Казан мәчетләрен карап кайтырга да җыена.
Универсиада авылында дин тота торган мөселманнар өчен бар шартлар да тудырылган: махсус бүлмә бар, Диннәр үзәгендә имам эшли, ашханәдә исә хәләл ризык әзерлиләр һәм ифтарлар оештыралар.
"Ватаным Татарстан"
