Сорау: Әссәламү галәйкүм! Тәһарәт алганда мисвак куллану мәҗбүриме? Мисвак урынына теш щеткасы кулланырга ярыймы?
Җавап: Үә галәйкүм әссәлам! Мисвак куллану – тәһарәтнең сөннәт өлешенә карый, шунлыктан аннан читләшергә кирәкми.
Имам Әл-Мәүсыйли “Әл-Ихтыяр” исемле хезмәтендә болай яза:
و السواك لأنه صلى الله عليه و سلم واظب عليه و قال: «أوصاني خليلي جبريل بالسواك» رواه ابن ماجه في سننه
“Мисвак куллану – сөннәт, чөнки Пәйгамбәребез (сгв) аны гел кулланган һәм “Минем дустым Җәбраил миңа мисвак кулланырга киңәш итте”, дия торган булган” (Ибне Мәҗә).
Мисвакны теш щеткасы белән алыштырырга ярый, әмма гарак агачының ботаклары, тамырларыннан ясалган чистарткычны, ягъни мисвакны куллану хәерлерәк, чөнки аны Пәйгамбәребез (сгв) кулланган.
Ә Аллаһ яхшырак белә!
