Үзбәкстан мөселманнары дини идарәсенең рәисе, мөфти хәзрәт Усманхон хаҗи Алимов бу дөньядан китеп барган. Кайгылы хәбәр килеп ирешү белән, Татарстан мөселманнары башлыгы, мөфти Камил хәзрәт Сәмигуллин хәзрәтнең якыннарының һәм Үзбәкстан мөселманнарының ачы хисләрен уртаклашты:
"Үзбәк кардәшләребезнең өммәте олы югалту кичерә - Үзбәкстан мөселманнары дини идарәсенең хөрмәтле рәисе, мөхтәрәм мөфти хәзрәтләре Усманхон хаҗи Алимов вафат. Озак еллар дәвамында ул үзенең җаваплы вазифаларын намуслы башкарып, Үзбәкстанда ислам үсешенә саллы өлеш кертә, хезмәтен динебез өчен җан атып башкара. Аның бәяләп бетергесез тәҗрибәсе мөселман җәмгыятенә әле күп файда китерә алыр иде. Татарстан Диния Нәзарәте һәм шәхсән үз исемемнән мәрхүмнең гаиләсенең һәм үзбәк кардәшләрнең тирән кайгысын уртаклашам. Аллаһы Тәгаләдән хәзрәтнең гөнаһларын гафу итүен һәм Үзенең киң рәхмәтеннән ташламавын, аның туганнары һәм якыннарына, барча шәкертләренә шушы авыр кайгыны кичерергә сабырлык бирүен сорыйм. "Без Аллаһыдан, һәм Аллаһыга кайтачакбыз".
Татарстан мөфтие Камил хәзрәт Сәмигуллин
