Республикабыз мөхтәсибәтләре “Мәктәпкә җыенырга ярдәм ит” акциясенә кушылды. Шушы көннәрдә Чистай мөхтәсибәте “Камалия” тәрбия үзәге һәм Ислам үзәге мәйданчыкларында беренче тапкыр мәктәпкә баручы - 25 һәм башлангыч сыйныфларда укучы 20 бала өчен бәйрәм оештырды. Һәр балага мәктәпкә кирәкле канцтоварлар һәм кирәк-яраклар сатып алу өчен сертификат тапшырылды. Балаларны якынлашып килүче яңа уку елы белән котладылар. Үзләренең ихлас теләкләрен мөхтәсиб Мөхәммәт хәзрәт Кыямов, Чистай муниципаль районы Башкарма комитеты җитәкчесе урынбасары Галина Задворнова, Аксакаллар Шурасы җитәкчесе Фәрит Галимов, бәйрәмнең иганәчеләре Халит Гарифуллин һәм "Чистави" бизнес-клубы вәкилләре җиткерде.
Моннан тыш, балаларны мавыктыргыч флешмоб һәм театр студиясендә, инглиз телен өйрәнү һәм иҗади мәйданчыкларда, юлда йөрү кагыйдәләрен өйрәнү станциясендә оештырылган мастер-класслар белән шатландырдылар.
Әлеге чара Ислам үзәге ишегалдында саф һавада чәй эчү белән тәмамланды.
