Мөхәррәм аеның 14 нче көнендә (22 нче августта) Азнакай мөхтәсибәте районның Балык тотучылар клубы белән берлектә мөселман яшьләре арасында балык тоту спорт төре буенча Чемпионат үткәрде. Ярышлар Татарстанның көньяк-көнчыгыш төбәге казыяте башлангычы белән быел дүртенче тапкыр оештырылды. Әлеге чара Идел буе Болгар дәүләтендә исламны кабул итүнең 1100-еллыгы Кубогына узды. Бәйгедә Татарстанның 8 мөхтәсибәтеннән 21 спортчы катнашты.
Быелгы ярышны үткәрү өчен Азнакай районы Сукаеш авылы буасы сайлап алынды – сулыкларга бай булган әлеге җирлектә ярышны югары дәрәҗәдә оештыру, куркынычсызлык чараларын тәэмин итү буенча зур әзерлек эшләре күрелде. Балык тотучыларны ТР Балык тоту спорты федерациясе хөкемдарлары бәяләде.
Җиңүчеләр, тотылган балык күләменнән чыгып, калкавычлы һәм төп кармакка (фидер) тоту буенча билгеләнде. Абсолют җиңүче булып калкавычлы кармакка иң күп балык тоткан, “Мөхәммәдия” мәдрәсәсен тәмамлаган, хәзерге вакытта Ютазы районы Урыссу поселогында яшәүче Ришат Гайнуллин танылды. Ул 10 килограмм балык тотты. Аңа Идел буе Болгар дәүләтендә исламны кабул итүнең 1100-еллыгы Кубогы һәм кыймәтле кармак бүләк ителде.
Башка җиңүчеләргә кыйммәтле бүләкләр: заманча кармаклар, катушкалар, балык тоту җайланмалары, кызыксындыру бүләкләре тапшырылды.
Ярыш барган вакытта намаз уку, туклану өчен барлык мөмкинлекләр булдырылды.
Тотылган барлык балык, яңа уку елыннан шәкертләрнең туклану рационына кертү өчен, Ютазы районы Урыссу бистәсенең “Фәнис” мәдрәсәсе ашханәсенә тапшырылды.
