Шушы көннәрдә Татарстанда «Экстремизмга – юк!» традицион айлыгы башланды. Бүген, 3 нче сентябрьдә, Террорчылыкка каршы көрәштә теләктәшлек күрсәтү көнендә, республиканың барлык мәчетләрендә экстремизм һәм аның начар нәтиҗәләре турында җомга вәгазьләре укылды.
Имам-хатыйблар вәгазьләр вакытында исламның – тынычлык, игелекле эшләргә чакыручы дин булуы, экстремистлар һәм террорчыларның эшчәнлеге хупланмавы турында сөйләде. Төп игътибарны ислам һәм Хәнәфи мәзһәбе традицияләрен аңлатуга, экстремистик төркемнәр һәм секталар тарафыннан пропагандалана торган ялган кыйммәтләрне фаш итүгә бирде.
Имам-хатыйблар, Коръән аятьләренә һәм хәдисләргә таянып, террорчыларның һәм экстремистларның үз гамәлләрен ислам дине кануннары белән бәйләп аңлатуларының ялган булуы хакында сөйләде, шулай ук аларга каршы торуның мөһимлеген ассызыклады.
Вәгазь ахырында мөселманнар терактлар аркасында һәлак булган мөселман кардәшләребез рухына дога кылды.
