26-27 сентябрьдә Истанбулда намаз вакытларын билгеләү буенча Халыкара конгресс узды. Әлеге чараны Төркиянең дин эшләре идарәсе, Төркия Республикасының дин эшләре буенча Югары советы, фәтвалар һәм тикшеренүләр буенча Ауропа советы оештырды. Конгресс эшендә Татарстан мөселманнары Диния нәзарәте Голәмәләр шурасының җаваплы сәркатибе, ислам фәннәре докторы Рөстәм хәзрәт Нургалиев та катнашты. Спикер буларак Рөстәм хәзрәт Татарстан һәм Россия Федерациясе территориясендә намаз вакытларын билгеләүнең методикасы һәм үзенчәлекләре турында сөйләде һәм нәзарәтнең Россия өчен уникаль булган төньяк киңлекләрдә намаз мәсьәләләрен өйрәнү тәҗрибәсе белән уртаклашты.
Намаз вакытларын билгеләү буенча халыкара конгресс Җир шарының төрле киңлекләрендә яшәүче мөселманнарны бердәм календарь белән тәэмин итү максатыннан уздырыла.
