Бисмилләһир-рахмәнир-рәхим.
Әссәламү галәйкүм вә рахмәтуллаһи вә бәрәкатүһү!
Мөхтәрәм дин кардәшләрем, кадерле милләттәшләрем!
Сезне Рабигыль әүвәл ае һәм якынлашып килүче Мәүлид Ән-Нәби көне белән ихластан тәбрик итәм!
Татар халкында Аллаһының сөекле илчесе, Аның лаеклысы, кешеләрнең башлыгы, барлык пәйгамбәрләрнең имамы, Кыямәт көненә кадәр җибәрелгән соңгы рәсүлебез Мөхәммәднең ﷺ Мәүлиден үткәрү – иң күркәм гореф-гадәтләрнең берсе. Бүген дә әби-бабаларыбызның шушы күркәм гадәтен дәвам иттерү татар өммәтендә кешелек тарихындагы иң өстен һәм камил, иң мактаулы һәм мәрхәмәтле, иң гыйлемле шәхес булган Мөхәммәдкә ﷺ ярату хисен арттыра, иманнарны ныгыта, күңелләрне пакьлый, динебезнең матур кыйммәтләрен тарата, милләтебезне үзенең рухи асылына кайтара.
Шатлыклы Мәүлид көннәрендә Аллаһы Тәгаләгә, Рәсүлен ﷺ җибәргәне өчен, рәхмәтләребез, хәмде-сәналарыбыз, олуглауларыбыз кабул булсын! Безне хак юлга күндерүче, барчаларыбызга иң күркәм үрнәк булучы, сөекле, нурлы Пәйгамбәребезгә ﷺ ихлас йөрәк түрләреннән чыккан сәламнәребез, салават-шәрифәләребез һәм һәртөрле изге догаларыбыз ирешсә иде. Раббыбыз милләтебезгә Пәйгамбәрнең ﷺ сөннәтенә ияреп яшәргә насыйп әйләсен! Әмин!
Татарстан мөфтие Камил хәзрәт Сәмигуллин
