Татарстан мөселманнары Диния нәзарәтенең “Хәләл” стандарт комитеты рәисе Габбас хәзрәт Шляпошников Татарстан Республикасының рәсми делегациясе составында Кыргызстан Республикасына эш сәфәре кылды. “Кыргызстан – Татарстан” эшлекле форумы кысаларында Габбас хәзрәт Кыргызстан Республикасы икътисад һәм коммерция министры Данияр Амангельдиев һәм Татарстан Республикасы премьер-министры урынбасары – Татарстан Республикасы сәнәгать һәм сәүдә министры Альберт Кәримовның очрашуында катнашты. Аннары очрашу Кыргызстан Республикасының Сәүдә-сәнәгать Палатасында узды, анда Габбас хәзрәт Шляпошников катнашучыларны Татарстанда тормышка ашырылучы “Хәләл лайфстайл” концепциясе белән таныштырды.
Моннан тыш, Габбас хәзрәт Кыргызстан мөфтие урынбасары Жоробай ажы Шергазиев һәм Кыргызстан ислам университеты проректоры Марс Ибраев белән очрашты. Габбас хәзрәт Кыргызстан Республикасында яшәүче дин кардәшләребезгә һәм тугандаш республика мөфтие Замир ажы Рәкыевка Татарстан мөфтие Камил хәзрәт Сәмигуллин исеменнән кайнар сәламнәр җиткерде. Дин әһелләре хәләл сертификация һәм гомумән хәләл индустрияне үстерү мәсьәләләрендә төп юнәлешләр буенча фикер алышты. Шунысын да билгеләп үтәргә кирәк, Кыргызстан Республикасы мөселманнары Диния нәзарәтенең “Хәләл” бүлеге «Хәләл индустрияне үстерү үзәге» дәүләт учреждениесе белән актив хезмәттәшлек итә.
Шунысы игътибарга лаек, “Кыргызстан – Татарстан” эшлекле форумы барышында Татарстан Республикасы Президенты Рөстәм Миңнеханов катнашында эшлекле килешүләргә кул куелды, шуларның берсе – Икътисад һәм коммерция министрлыгы каршындагы “Хәләл индустрияне үстерү үзәге” дәүләт учреждениесе белән Татарстан мөселманнары Диния нәзарәтенең “Хәләл” стандарт комитеты арасында хезмәттәшлек турында меморандум имзаланды. Документка Кыргызстан Республикасы тәкъдиме белән кул куелды.
